منگل 17 نومبر 2026 - 11:10
ہر سانس موت کی طرف ایک قدم ہے!

حوزہ/ یہ ایک ایسی حقیقت ہے جس سے نہ بادشاہ مستثنیٰ ہے، نہ فقیر، نہ عالم، نہ جاہل اور نہ ہی جوان۔ موت کسی کی حیثیت، شہرت یا مصروفیت سے متاثر نہیں ہوتی۔ آج جو شخص دوسروں کا جنازہ اپنے کندھوں پر اٹھائے ہوئے ہے، کل اسی کے جسدِ خاکی کو دوسرے کندھوں پر اٹھایا جائے گا۔

تحریر: مولانا سید کرامت حسین شعور جعفری

حوزہ نیوز ایجنسی|

انسان کی زندگی ایک ایسے خاموش قافلے کی مانند ہے جو مسلسل اپنی آخری منزل کی طرف رواں دواں ہے۔ عجیب المیہ ہے کہ اس قافلے کا ہر مسافر اپنی منزل سے واقف ہونے کے باوجود اس طرح زندگی گزارتا ہے جیسے اسے کبھی وہاں پہنچنا ہی نہ ہو۔ ہم مستقبل کے منصوبے بناتے ہیں، خواہشوں کے محل تعمیر کرتے ہیں، دولت و شہرت کے حصول کے لیے بھاگتے ہیں اور رشتوں و دنیاوی معاملات میں الجھے رہتے ہیں، لیکن یہ بھول جاتے ہیں کہ زندگی کا ہر گزرتا لمحہ ہمیں اس مقام کے قریب لے جا رہا ہے جہاں دنیا کی تمام مصروفیات بے معنی ہو جائیں گی۔

امیرالمؤمنین حضرت امام علی علیہ السلام کا یہ حکمت آموز فرمان انسانی وجود کو جھنجھوڑ دینے کے لیے کافی ہے:

«أَنْفَاسُ الْمَرْءِ خُطَاهُ إِلَى أَجَلِهِ»

انسان کی سانسیں اس کی موت کی طرف بڑھنے والے قدم ہیں۔

ذرا اس حقیقت کی گہرائی میں اتریے! جو سانس ابھی آپ نے لی ہے، وہ آپ کی زندگی سے ہمیشہ کے لیے رخصت ہو چکی ہے۔ دنیا کی کوئی طاقت اسے واپس نہیں لا سکتی۔ ہم سمجھتے ہیں کہ وقت گزر رہا ہے، حالاں کہ حقیقت یہ ہے کہ ہماری عمر گزر رہی ہے۔ گھڑی کی ہر حرکت ہماری مہلتِ حیات میں کمی کا اعلان کر رہی ہے، مگر ہم اس اعلان کو سننے کے لیے تیار نہیں۔

قرآن مجید اس اٹل حقیقت کا اعلان کرتے ہوئے فرماتا ہے:

كُلُّ نَفْسٍ ذَائِقَةُ الْمَوْتِ ۖ ثُمَّ إِلَيْنَا تُرْجَعُونَ۔

(العنکبوت: 57)

ہر جان کو موت کا ذائقہ چکھنا ہے، پھر تم سب ہماری ہی طرف لوٹائے جاؤ گے۔

یہ ایک ایسی حقیقت ہے جس سے نہ بادشاہ مستثنیٰ ہے، نہ فقیر، نہ عالم، نہ جاہل اور نہ ہی جوان۔ موت کسی کی حیثیت، شہرت یا مصروفیت سے متاثر نہیں ہوتی۔ آج جو شخص دوسروں کا جنازہ اپنے کندھوں پر اٹھائے ہوئے ہے، کل اسی کے جسدِ خاکی کو دوسرے کندھوں پر اٹھایا جائے گا۔

تصور کیجیے! ایک دن ایسا بھی آئے گا جب جس جسم کو ہم نے برسوں سنوارا، جس چہرے کی خوب صورتی پر ناز کیا اور جس گھر کو اپنا مستقل ٹھکانہ سمجھا، سب کچھ پیچھے رہ جائے گا۔ ہماری زبان خاموش، آنکھیں بند اور ہاتھ بے حرکت ہوں گے۔ وہ لوگ جن کے لیے ہم نے اپنی زندگی کے کتنے ہی قیمتی لمحات صرف کیے، ہمیں چند قدم قبر تک پہنچا کر واپس لوٹ جائیں گے۔ گھر کا دروازہ پھر کھلے گا، چراغ پھر روشن ہوں گے اور زندگی کے معمولات دوبارہ شروع ہو جائیں گے، لیکن ہماری جگہ خالی ہوگی۔

رسول اکرم صلی اللہ علیہ وآلہ وسلم کا ارشاد ہے:

«أَكْثِرُوا ذِكْرَ هَادِمِ اللَّذَّاتِ»

لذتوں کو ختم کر دینے والی موت کو کثرت سے یاد کرو۔

(الکافی، کتاب الجنائز، باب ذکر الموت)

موت کی یاد انسان کو زندگی سے مایوس نہیں کرتی، بلکہ اسے زندگی کا صحیح مصرف سکھاتی ہے۔ موت کو یاد رکھنے والا انسان تکبر کرنے سے پہلے اپنی مٹی کو دیکھتا ہے، ظلم کرنے سے پہلے روزِ حساب کو یاد کرتا ہے اور کسی کا حق چھیننے سے پہلے اس حقیقت پر غور کرتا ہے کہ ایک دن اسے اپنے ہر عمل کا جواب دینا ہوگا۔

انسان کی غفلت کا سب سے دردناک پہلو یہ ہے کہ اسے اپنی مہلت کی قدر اس وقت معلوم ہوتی ہے جب مہلت ختم ہونے لگتی ہے۔ قرآن مجید اس کیفیت کو ان الفاظ میں بیان کرتا ہے:

حَتّٰى إِذَا جَاءَ أَحَدَهُمُ الْمَوْتُ قَالَ رَبِّ ارْجِعُونِ ۝ لَعَلِّي أَعْمَلُ صَالِحًا فِيمَا تَرَكْتُ۔

(المؤمنون: 99-100)

یہاں تک کہ جب ان میں سے کسی کے پاس موت آتی ہے تو وہ کہتا ہے: اے میرے پروردگار! مجھے واپس بھیج دے، شاید میں اب نیک عمل کر لوں۔

یہ آیت محض ایک واقعے کی خبر نہیں، بلکہ انسان کے مستقبل کی ایک ہولناک تصویر پیش کرتی ہے۔ وہ شخص جس نے زندگی بھر نیکی کو کل پر چھوڑا، اب ایک لمحے کی مہلت مانگ رہا ہوگا۔ اسے یاد آئے گا کہ اس نے کتنے دل دکھائے، کتنے حقوق ادا نہیں کیے، کتنی نمازیں قضا کیں، کتنے ضرورت مند اس کے دروازے سے خالی ہاتھ لوٹے اور کتنے مواقع اپنی غفلت کے باعث ضائع کر دیے۔ لیکن اب اس کی خواہش کے باوجود دنیا میں واپسی ممکن نہیں ہوگی۔

امیرالمؤمنین حضرت امام علی علیہ السلام کا ارشاد ہے:

«الْيَوْمَ عَمَلٌ وَلَا حِسَابٌ، وَغَدًا حِسَابٌ وَلَا عَمَلَ»

آج عمل کا دن ہے اور حساب نہیں، جبکہ کل حساب ہوگا اور عمل کا کوئی موقع نہیں ہوگا۔

(نہج البلاغہ، حکمت 42)

یہی زندگی کا اصل امتحان ہے۔ ہماری کامیابی اس بات میں نہیں کہ ہم نے کتنی دولت جمع کی، کتنے عہدے حاصل کیے یا کتنے لوگوں سے اپنی تعریف کروائی، بلکہ اصل کامیابی اس میں ہے کہ ہم نے اپنے وجود سے کتنا خیر پھیلایا، کتنے مظلوموں کا سہارا بنے، کتنے دلوں کو سکون پہنچایا اور اپنے پروردگار کے حضور پیش کرنے کے لیے کتنا صالح عمل جمع کیا۔

آئیے! ہم اپنے آپ سے ایک سوال کریں: اگر آج ہماری زندگی کی آخری شام ہو تو کیا ہم اپنے اعمال کے ساتھ اپنے رب کے حضور پیش ہونے کے لیے تیار ہیں؟ کیا ہمارے ذمے کسی کا کوئی حق باقی نہیں؟ کیا ہماری زبان کسی کے لیے اذیت کا سبب نہیں بنی؟ کیا ہمارے والدین، اہل و عیال اور معاشرے کے لوگ ہمارے کردار سے مطمئن ہیں؟

ابھی وقت ہے کہ ہم اپنے گریبان میں جھانکیں، اپنی خطاؤں کا اعتراف کریں، حقوق العباد ادا کریں، ٹوٹے ہوئے رشتوں کو جوڑیں، کسی محروم کے چہرے پر مسکراہٹ لائیں اور اپنے پروردگار کی طرف سچے دل سے پلٹ آئیں۔

یاد رکھیے! موت زندگی کا خاتمہ ضرور ہے، لیکن اعمال کی کہانی کا اختتام نہیں۔ دنیا میں ہمارا کردار ختم ہو جائے گا، مگر اس کردار کا حساب باقی رہے گا۔

لہٰذا زندگی کو صرف طویل بنانے کی کوشش نہ کیجیے، بلکہ اسے اس قدر بامقصد بنائیے کہ جب آخری سانس رخصت ہو تو ہمارے پیچھے نیکی کی خوشبو، انسانیت کی گواہی اور اعمال کی روشنی باقی رہ جائے۔

سانسیں ہماری ملکیت نہیں، بلکہ ہمیں عطا کی گئی ایک مہلت ہیں اور اس مہلت کا ہر لمحہ ایک ایسا سوال ہے جس کا جواب ہمیں ایک دن ضرور دینا ہوگا۔

لیبلز

آپ کا تبصرہ

You are replying to: .
captcha